О законѣ Моисеомъ даннѣмъ ему, и о благодати и истинѣ Іисусъ Христомъ бывшимъ; и како законъ отъиде, благодать же и истина всю землю исполни, и Вѣра въ вся языкы простреся, и до нашего языка Русскаго; и похвала Кагану нашему Владимиру, отъ негоже крещени быхомъ, и молитва къ Богу отъ всеа земля нашеа.

Господи благослови Отче!

Благословенъ Господь Богъ Іизраилевъ, Богъ Христіанескъ, яко посѣти и сътвори избавленіе людемъ своимъ, яко не презрѣ твари своея до конца идольскимъ мракомъ одержимѣ быти и бѣсовскыимъ служеніимъ, но оправди прежде племя Авраамле скрижальми и закономъ, послѣжде Сыномъ своимъ вся языки спасе Евангеліемъ и крещеніемъ, и вводя въ обновленіе пакыбытіа въ жизнь вѣчную. Да хвалимъ Его убо и прославляемъ хвалимаго отъ Ангелъ беспрестани и поклонимся Ему, Емуже безпрестани кланяются Херувими и Серафими, яко призря призрѣ на люди своа, и не посолъ, ни вѣстникъ, но Самъ спасе ны, не привидѣніемъ пришедъ на землю, но истинно, пострадавъ за ны плотію и до гроба, и съ Собою воскресивъ ны. Къ живущиимъ бо на земли человѣкомъ, въ плоть одѣався, пріиде; къ сущимъ же въ адѣ, распятіемъ и въ гробѣ полежаніемъ, сниде: да обои, и живіи и мертвіи, познаютъ посѣщеніе свое и Божіе прихожденіе, и разумѣютъ, яко есть живыимъ и мертвыимъ крѣпокъ и силенъ Богъ. Кто бо велій, яко Богъ нашъ? Тъ единъ творяй чудеса, положивый законъ на проуготованіе истины и благодати, да въ немъ обыкнеть человѣчьское естество, отъ многобожьства идольскааго укланяяся, въ единаго Бога вѣровати, да, яко съсудъ скверненъ, человѣчьство, и помъвенъ водою закономъ и обрѣзаніемъ, пріиметъ млеко благодати и крещеніа. Законъ бо предтечя бѣ и слуга благодати и истинѣ; истина же и благодать слуга будущему вѣку, жизни нетлѣннѣй. Яко законъ привождааше възаконеныа къ благодатному крещенію: крещеніе же препущаетъ сыны своя на вѣчную жизнь. Моисій бо и пророцы о Христовѣ пришествіи повѣдаху: Христосъ же и Апостоли Его о въскресеніи и о будущемъ вѣцѣ.

А еже поминати въ писаніи семъ и пророческаа проповѣданіа о Христѣ, и Апостольскаа ученіа о будущемъ вѣцѣ, то излиха есть и на тщеславіе скланяяся. Иже бо въ инѣхъ книгахъ писано и вамъ вѣдомо, тіи здѣ положити, то дръзости образъ есть и славохотію. Не къ невѣдущимъ бо пишетъ, но преизлиха насыщщемся сладости книжныя; не къ врагомъ Божіимъ иновѣрнымъ, но самѣмъ сыномъ Его; не къ страннымъ, но къ наслѣдникомъ небеснаго царствіа. Но о законѣ Моисеомъ даннѣмъ и о благодати и истинѣ Іисусъ Христомъ бывшиимъ, повѣсть си есть.

И что успѣ законъ? Что ли благодать? Прежде законъ, потомъ благодати; прежде стѣнь, ти потомъ истина. Образъ же закону и благодати—Агаръ и Сарра, работнаа Агаръ и свободнаа Сарра: работнаа прежде, ти потомъ свободнаа. И да разумѣетъ, иже чтетъ. Яко Авраамъ убо отъ уности своея Сарру имѣ жену си, свободну, а не рабу: и Богъ убо прежде вѣкъ изволи и умысли Сына Своего въ міръ послати, и тѣмъ благодати явитися.—Сарра же не раждаше, понеже бѣ неплоды; не бѣ неплоды, но заключена бѣ Божіимъ Промысломъ на старость родити: безвѣстная же и утаеннаа мудрости Божіа утаена бяху Ангелъ и человѣкъ, и не яко не явима, но утаена и на конецъ вѣка хотяща явитися.—Сарра же глагола къ Аврааму: се заключи мя Господь Богъ не раждати; вниди убо къ рабѣ моей Агари, и родиши отъ нея. Благодать же глагола къ Богу: аще нѣсть времене снити ми на землю и спасти міръ, сниди на гору Синай и законъ положи.—Послуша Авраамъ рѣчи Саррины, и вниде къ рабѣ ея Агари. Послуша и Богъ яже отъ благодати словесъ, и сниде на Синай.—Роди же Агаръ раба отъ Авраама робичищъ, и нарече Авраамъ имя ему: Измаилъ. И снесе Моисей отъ Синайскыя горы законъ, а не благодать, стѣнь, а не истину.—По сихъ же уже стару сущу Аврааму и Саррѣ, явися Богъ Аврааму, сѣдящу ему прѣдъ дверьми куща своеа, въ полудне, у дуба Мамврійскаго; Авраамъ же тече въ срѣтеніе Ему и поклонися Ему до землѣ, и приатъ въ кущу свою. Вѣку же сему къ концу приближающуся посѣти Господь человѣчьскаго рода и сниде съ небесе, въ утробу Дѣвицы въходя; приятъ же и Дѣвица съ покланяніемъ въ кущу плотяную, не болѣвши, глаголющи къ Ангелу: се раба Господня, буди мнѣ по глаголу твоему.—Тогда убо отключи Богъ ложесна Саррина, и заченши роди Исаака, свободнаа свободнаго. Присѣтившу Богу человѣчьска естества, явишася уже безвѣстная и утаеная, и родися благодать и истина, а не законъ; Сынъ, а не рабъ.—Яко отдоися отроча Исаакъ и укрѣпѣ, и сътвори Авраамъ гостивсвту велику, егда отдоися Исаакъ, сынъ его. Егда бѣ Христосъ на земли, и еще благодать не укрѣпѣла бѣаше, но дояашеся еще, за л҃ лѣтъ, въ няже Христосъ таяшеся; егда же отдоися и укрѣпѣ, явися благодать Божіа спасеннаа всѣмъ человѣкомъ въ Іерданстѣй рѣцѣ; сътвори Богъ гостивству велику и пиръ великъ тельцемъ упитаннымъ отъ вѣка, възлюбленныимъ Сыномъ своимъ Іисусъ Христомъ, съзвавъ на едино веселіе небесныа и земленыя, съвъкупивъ въ едино Ангелы и человѣкы.—По сихъ же видѣвши Сарра Измаила, сына Агарина, играюща съ сыномъ своимъ Исаакомъ, и яко приобидѣнъ бысть Исаакъ Измаиломъ, рече къ Аврааму: отжени рабу и съ сыномъ ея: не имать бо наслѣдовати сынъ рабынинъ сына свободныа. По възнесеніи же Господа Іисуса, ученикомъ и инѣмъ уже вѣровавашимъ въ Христа сущимъ въ Іерусалимѣ, и обоимъ смѣсь сущимъ, Іудеомъ же и Христіяномъ, и крещеніе благодатьное обидимо бѣаше отъ обрѣзаніа законнаго, и не пріимаше въ Іерусалимѣ Христіанскаа Церкви Епископа необрѣзанія: понеже старѣйше творящеся, сущеи отъ обрѣзаніа насиловааху на Христіаныа, рабичичи на сыны свободныа, и бывааху между ими распря многы и которы. Видѣвши же свободнаа благодать чяда своа Хрістіаныя обидимы отъ Іюдей, сыновъ работнаго закона, възопи къ Богу: отжени Іюдеа и съ закономъ, расточи по странамъ. Кое бо причастіе стѣню съ истиною, Іюдейству съ Христіаньствомъ?—Отгнана бысть Агарь раба съ сыномъ ея Измаиломъ, и Исаакъ, сынъ свободныя, наслѣдникъ бысть отцу своему Аврааму. И отгнани бышя Іюдеи и расточени по странамъ, и чяда благодатная Христіаніи наслѣдницы бышя Богу и Отцу. Отъиде бо свѣтъ луны, солнцу въсіявшу, тако и законъ, благодати явльшейся, и студенство нощное погибе, сълнечнѣй теплотѣ землю съгрѣавши. И уже не гордится въ законѣ человѣчьство, но въ благодати пространно ходить. Іюдеи бо при свѣщи законнѣй дѣлааху свое оправданіе: Христіаніи же при благодатьнѣемъ сълнци свое спасеніе зиждуть. Яко Іюдейство стѣнемъ и закономъ оправдаашеся, а не спасаашеся; Христіаніи же истинною и благодатію—не оправдаются, но спасаются. Въ Іюдеохъ бо оправданіе, въ Христіаныхже спасеніе, яко оправданіе въ семъ мірѣ есть, а спасеніе намъ въ будущемъ вѣцѣ. Іюдеи бо о земныхъ веселяахуся, Христіаніи же о сущихъ на небесѣхъ. И тожде оправданіе Іюдейско скупо бѣ зависти ради, не бо ся простираше въ ины языкы, но токмо въ Іюдеи бѣ единой: Христіаныихъ же спасеніе благо и щедро, простираася на вся краа земленыя. И сбысться благословеніе Манасіино на Іюдеохъ, Ефремово же на Христіаныихъ. Манасіино бо старѣйшинство лѣвицею Іаковлею благословено бысть. Ефремово же меншенство десницею, аще и старѣй Манасей Ефрема, но благословеніемъ Іаковлемъ мній бысть. Тако и Іюдейство, аще и прежде бысть, но благодатію Христовою Христіане больше бѣшя. Рекшу бо Іосифу къ Іакову: на семъ, отче, положи десницу, яко съ старѣй есть, отвѣща Іаковъ: вѣмъ, чадо, и тъ будетъ въ люди, и възнесется: но братъ его мній болій его будетъ, и племя его будетъ въ множество языкъ, якожь и бысть. Законъ бо прежде бѣ и възнесеся вмалѣ, и отъиде. Вѣра же Христіянскаа, послѣжде явльшися, больши первыа бысть, и расплодися на множьство языкъ, и Христова благодать всю землю обьятъ, и яко вода морскаа покры ея, и вси, ветхаа отложше, обетшавшаа завистію Іюдейскою, новаа держатъ, по пророчьству Исаину: ветхаа мимоидоша, и новаа вамъ възвѣщаю. Пойте Богу пѣснь нову, и славимо есть имя Его отъ конецъ земля, и сходящеи въ море и плавающеи по нему, и острови вси. И пакы: работающимъ Ми наречется имя ново, еже благословится на земли: благословятъ бо Бога истиннаго. Прежде бо бѣ въ Іерусалимѣ единомъ мѣсто кланятися, нынѣ же по всей земли. Якоже рече Гедеонъ къ Богу: аще Ты рукою моею спасаеши Израиля, да будетъ роса на рунѣ токмо, по всей же земли суша; и бысть тако. По всей земли суша прежде бѣ идольстѣй льсти языки одръжащи и росы благодатныя непріемлющимъ. Въ Іюдеохъ же токмо знаемъ бѣ Богъ, и въ Ізраили веліе имя Его, и въ Іерусалимѣ единомъ славимъ бѣ Богъ. Рече же паки Гедеонъ къ Богу: да будетъ сушя на рунѣ токмо, по всей же земли роса; и бысть тако. Іюдейство бо преста и законъ отъиде, кивотъ и скрижали и оцѣстило отъято бысть. По всей же земли роса: по всей бо земли Вѣра простреся, дождь благодатный оброси, купѣль пакы-порожденіа сыны своя въ нетлѣніе облачитъ. Якоже и къ Самаряныни глаголааше Спасъ, яко грядетъ година и нынѣ есть, егда ни въ горѣ сей, ни въ Іерусалимѣхъ поклонятся Отцу, но будутъ истиніи поклонници, иже поклонятся Отцу духомъ и истинною. Ибо Отець тацѣхъ ищетъ покланяющихся Ему,—рекше съ Сыномъ и съ Святымъ Духомъ. Якоже и есть: по всей же земли уже славится святаа Троица, и покланяніе отъ всеа твари пріемлетъ, и маліи и велиціи славятъ Бога, по пророчьству: и не научитъ кійждо искрьняго своего и человѣкъ брата своего, глаголя: познай Господа; яко увѣдятъ Мя отъ малыхъ и до великааго. Якоже и Спасъ Христосъ къ Отцу глаголааше: исповѣдаютися Отче, Господи небеси и земли, яко утаилъ еси отъ премудрыихъ и разумныихъ, и открылъ еси младенцемъ: ей, Отче, яко тако бысть благоизволеніе предъ Тобою. И толма помилова благый Богъ человѣчьскый родъ, яко и человѣцы плотяни крещеніемъ и благыми дѣлы сынове будутъ и причастницы Христу Богу. Елицы бо, рече Евангелистъ, пріаша Его, дасть имъ власть чядомъ Божіимъ быти, вѣрующимъ въ имя Его, еже ни отъ крове, ни отъ похоти плотски, ни отъ похоти мужскы, но отъ Бога родишася, Святыимъ Духомъ въ святѣй купѣли. Вся же си Богъ нашъ на небеси и на земли, елика въсхотѣ, и сътвори.

Тѣмже, кто не прославитъ, кто не похвалитъ, кто не поклонится величьствію славы Его, и кто не подивится безчисленному человѣколюбію Его? Прежде вѣкъ отъ Отца рожденъ, единъ съпрестоленъ Отцу, едіносущенъ, якоже солнцу свѣтъ, сниде на землю, посѣти людій своихъ, не отлучився Отца, и въплотися отъ Дѣвицы чисты, безмужны, бескверны, вшедъ, якоже Самъ вѣсть; плоть пріимъ,—изыде, якоже вниде; единъ сый отъ Троица, въ двѣ естьствѣ, Божество и человѣчество: исполнь человѣкъ, по въчеловѣченью, а не привидѣніемъ; но исполнь Богъ по Божеству, а не прстъ человѣкъ. Показаа на земли Божескаа и человѣчьскаа: яко человѣкъ, во утробѣ матерни растяаше, и яко Богъ, изыде, дѣвьства не вреждь; яко человѣкъ, матерне млеко пріятъ, и яко Богъ, пристави Ангелы съ пастухи пѣти: слава въ вышніихъ Богу; яко человѣкъ, повився въ пелены, и яко Богъ, звѣздою влъхвы вождааше; яко человѣкъ, въ яслехъ възлеже, и яко Богъ, отъ влъхвъ дары и поклоненіе приятъ; яко человѣкъ, бѣжаше въ Егѵпетъ, и яко Богу рукотвореннаа Егѵпетскаа поклонишася; яко человѣкъ пріиде на крещеніе, и яко Бога устрашився, Іорданъ възвратися: яко человѣкъ, обнажився вниде въ воды, и яко Богъ, отъ Отца послушество пріятъ: съ есть Сынъ мой възлюбленный; яко человѣкъ, постися м҃ дній и взалка, и яко Богъ побѣди искушающаго; яко человѣкъ, иде на бракъ въ Кана Галилеи, и яко Богъ, воду въ вино преложи; яко человѣкъ, въ карабли спаше, и яко Богъ запрѣти вѣтромъ и морю, и послушаша Его; яко человѣкъ, по Лазари прослезися, и яко Богъ, въскреси и отъ мертвыхъ; яко человѣкъ, на осля всѣде, и яко Богу зваху: благословенъ грядый въ имя Господне; яко человѣкъ, распятъ бысть, и яко Богъ, своею властію спропятаго съ Нимъ впусти въ рай; яко человѣкъ, оцта вкуси и испусти духъ, и яко Богъ, солнце помрачи и землю потрясе; яко человѣкъ, въ гробѣ положенъ бысть, и яко Богъ, ада раздруши и душа свободи; яко человѣка печатлѣшя въ гробѣ, и яко Богъ изыде, печати цѣлы съхрань; и яко человѣка тщахуся Іудеи утаити въскресеніе, мъздяще стражей, но яко Богъ увѣдѣся, и познанъ бысть всѣми конци земля. По истинѣ кто Богъ велій яко Богъ нашъ? Тъ Богъ есть творяй чудеса, съдѣла спасеніе посредѣ земля крестомъ и мукою, на мѣстѣ лобнѣмъ, вкусивъ оцта и желчи, да сластнаго вкушенія Адамова, еже отъ древа, преступленіе и грѣхы вкушеніемъ горести проженетъ.

Си же сътворшеи Ему преткнушяся, акы о камень, и съкрушишяся, якоже Господь глаголаше: падый на камени семъ съкрушится, а на немже падетъ, сокрушитъ и. Пріиде бо къ нимъ, исполняа пророчьства пророченнаа о Немъ, якоже и глаголаше: нѣсмь посланъ, токмо къ овцамъ погыбшимь дому Израилеву; и пакы: не пріидохъ разорить закона, но исполнити. И къ Хананеи иноязычицы, просящой исцѣленія дщери своей, глаголааше: нѣсть добро оттяти хлѣба отъ чядъ, и поврещи псомъ. Они же нарекоша и лестьца, и отъ блуда рождена, и о вельзаулѣ бѣсы изгоняща. Христос слѣпыя ихъ просвѣти, прокаженныа оцѣсти, слукыя исправи, бѣсныя исцѣли, разъслабленыя укрѣпи, мертвыя въскреси: они же, яко злодѣя, мучивше, на крестѣ пригвоздиша. Сего ради пріиде на ня гнѣвъ Божій конечный, якоже и сами послушествоваша своей погыбели. Рекшу Спасу притчю о виноградѣ и о дѣлателехъ: что убо сътворитъ дѣлателемъ тѣмъ? И отъвѣщаша: злыя злѣ погубитъ, и виноградъ предастъ инѣмъ дѣлателемъ, иже въздадятъ ему плоды въ время свое,—и сами своей погыбели пророци бышя. Пріиде бо на землю посѣтити ихъ, и не прияша Его; понеже дѣла ихъ темна бяху, не възлюбишя свѣта, да не явятся дѣла ихъ, яко темна суть. Сего ради приходя Іисусъ къ Іерусалиму, видѣвъ градъ, прослезися о немъ, глаголя: яко аще бы разумѣлъ ты въ день твой се, яже къ миру твоему: нынѣ же скрыся отъ очію твоею. Яко пріидутъ дніе на тя, и обложатъ врази твои острогъ о тебѣ, и обыдутъ тя, и обымутъ тя всюду, и разбіютъ тя и чяда твоа на тебѣ: понеже не разумѣ посещеніа твоего. И пакы: Іерусалимъ, Іерусалимъ, избиваяй Пророкы, и каменіемъ побиваяй посланныя къ тебѣ! Колижды въсхотѣхъ събрати чяда твоя, якоже събираетъ кокошь птенца своя подъ крылѣ свои, и не въсхотѣсте. Се оставляется домъ вашъ пустъ. Якоже и бысть: пришедше бо Римляне плѣнишя Іерусалимъ, разбишя и до основанія его. И Июдейство оттолѣ погыбе, и законъ посемъ, яко вечерняа заря, погасе, и разсѣяна быша Іюдеи по странамъ, да не вкупѣ злое пребываетъ.

Пріиде бо Спасъ и не пріятъ бысть отъ Израиля, по Евангельскому слову: въ своя пріиде, и свои Его не пріяшя,—отъ языкъ же пріятъ бысть, якоже рече Іаковъ: и тъ чаяніе языкомъ. Ибо и въ рожденіи Его влъсви отъ языкъ прежде поклонишася Ему, а Іюдеи искаху Его убити, егоже ради и младенца избишя. И сбысться слово Спасово, яко мнози отъ востокъ и западъ пріидутъ, и възлягутъ съ Авраамомъ, Ісаакомъ, Іаковомъ въ царьствіи небеснѣмъ, а сынове царствія изгнани будуть въ тму кромѣшнюю. И пакы, яко отъимется отъ васъ царство Божіе, и дасться странамъ, творящымъ плоды его, книмъ же посла ученикы своя, глаголя: шедше въ миръ весь, проповѣдите Евангеліе всей твари, да иже вѣру иметъ и крестится, спасенъ будетъ; и: шедше научите вся языкы, крестяще я въ имя Отца и Сына и Святаго Духа, учяще я блюсти вся, елика заповѣдахъ вамъ. Лѣпо бо бѣ благодати и истинѣ на новыя люди въсіяти: не вливаютъ бо, по словеси Господню, вина новаго, ученіа благодатна, въ мѣхы ветхы, обетшавшаа въ Іюдействѣ; аще ли то, просядутся мѣси и вино проліется. Не могше бо закона стѣнь удержати, но многажды идоломъ ся поклонявше, како истинныя благодати удержатъ ученіе? Но ново ученіе, новы мѣхы—новы языкы, и обое съблюдется.

Якоже и есть: Вѣра бо благодатнаа по всей земли распростреся, и до нашего языка Русскаго дойде, и законное езеро пресыше, Евангельскый же источникъ наводнився и всю землю покрывъ, и до насъ проліявся. Се бо уже и мы съ всѣми Христіянами славимъ Святую Троицу, а Іюдея млъчитъ. Христосъ славимъ бываетъ, а Іюдеи кленоми; языцы приведени, а Іудеи отриновени, якоже Пророкъ Малахія рече: нѣсть Ми хотѣніе въ сынохъ Израилевѣхъ, и жрътвы отъ рукъ ихъ не пріиму: понеже отъ въстокъ же и западъ имя мое славимо есть въ странахъ, и на всякомъ мѣстѣ теміанъ имени моему приносится, яко имя мое велико есть въ странахъ. И Давидъ: вся земля поклотътися, и поетъ Тебѣ. И: Господи, Господь нашь, яко чюдно имя твое по всей земли. И уже не идолослужителе зовемся, но Христіани; не и еще безнадежници, но уповающе въ жизнь вѣчную. И уже не капищь съграждаемъ, но Христовы церкви зиждемъ; уже не заклаемъ бѣсомъ другъ друга, но Христосъ за ны заклаемъ бываетъ и дробимъ въ жрътву Богу и Отцу. И уже не жерътвенныа крове вкушающе погыбаемъ, но Христовы пречистыа крове вкушающе спасаемся. Вся страны благый Богъ помилова, и насъ на презрѣ; въсхотѣ, и спасе ны, и въ разумъ истинный приведе. Пустѣ бо и преиссохши земли нашей сущи, идольскому зною изсушившу ю, внезапу потече источникъ Евангельский, напая всю землю нашу, якоже рече Исаіа: разверзется вода ходящіимъ по безднѣ, и будутъ безводная въ блата, и въ земли жаднѣй источникъ воды будеть. И бывъшимъ намъ слѣпымъ, истиннаго свѣта невѣдящимъ, но въ льсти идольстѣй блудящемъ, ксему же и глухимъ отъ спасенаго ученіа,—помилова ны Богъ, и възсіявъ на насъ свѣтъ разума, еже познати Его, по пророчьству: тогда отверзутся очеса слѣпыхъ, и ушеса глухыхъ услышятъ. И потыкающимся намъ въ путехъ погыбели, еже бѣсомъ въслѣдовати, и пути ведущаго въ животъ невѣдущимъ, ксемужъ и гугнахомъ языки нашими, моляще идолы, а не Бога своего и Творца, посѣти насъ человѣколюбіе Божіе, и уже не послѣдуемъ бѣсомъ, но ясно славимъ Христа Бога нашего, по пророчьству: тогда скочитъ хромый, яко елень, и ясенъ будетъ языкъ гугнивыхъ. И прежде бывшемъ намъ, акы звѣремъ и скотомъ, не разумѣющимъ десницѣ и шуйцѣ, и земленыхъ прилежащемъ, и нимала о небесныхъ попекущемся, посла и къ намъ Господь заповѣди, ведущаа въ жизнь вѣчную, по пророчьству Іосіину: и будетъ въ день онъ, глаголетъ Господь, завѣщаю имъ завѣтъ съ птицами небесными и звѣрми землеными, и реку не людемъ моимъ: людіе мои вы, и Тіи Ми рекутъ: Господь Богъ нашь Ты еси. И тако, странни суще, людіе Божіи нарекохомся, и врази бывше, сынове Его прозвахомся; а не Іюдейскы хулимъ, но Христіанъскы благословимъ; не съвѣта творимъ, яко распяти и, но яко Распятому поклонитися. Не распинаемъ Спаса, но рукы къ Нему въздѣваемъ; не прободаемъ ребръ, но отъ нихъ піемъ источникъ нетлѣніа; ни тридесяте сребра взимаемъ на Немъ, но другъ друга и весь животъ Тому предаемъ; не таимъ въскресеніа, но въ всѣхъ домохъ своихъ зовемъ: Христосъ въскресе изъ мертвыхъ! Не глаголемъ, яко украденъ бысть, но яко възнесеся, идѣже и бѣ; не невѣруемъ, но яко Петръ, къ Нему глаголемъ: Ты еси Христосъ, Сынъ Бога живаго; съ Фомою: Господь нашь и Богъ Ты еси; съ разбойникомъ: помяни ны, Господи, егда пріидеши въ царствіи си. И тако вѣрующе къ Нему, и святыхъ Отецъ з҃ съборъ преданіе держаще, и молимъ Бога и еще и еще поспѣшити, и направити ны на путь заповѣдей Его.

И събысться о насъ языцѣхъ реченное: открыетъ Господь мышцу свою святую предъ всѣми языкы, и узрятъ вси концы земля спасеніе, еже отъ Бога нашего. И другое: живу Азъ, глаголетъ Господь, яко Мнѣ поклонится всяко колѣно, и всякъ языкъ исповѣсться Богу. И Исаіно: всяка дебрь исполнится, и вся горы и хлъми смирятся, и будетъ криваа въ праваа, и остріи въ пути гладкы и явится слава Господня; и всяка плоть узритъ спасеніе Бога нашего. И Даніилъ: вси языцы, людіе, племена Тому поработаютъ. И Давидъ: да исповѣдятся Тебѣ людіе, Боже, да исповѣдятся Тебѣ людіе вси, да възвеселятся и възрадуются языци; вси языци въсплещите руками; въскликнѣте Богу гласомъ радости, яко Господь Вышній страшенъ, Царь велій по всей земли. И помалѣ: пойте Богу нашему, пойте, пойте Цареви нашему, пойте, яко Царь всей земли Богъ, пойте разумно. Въцарися Богъ надъ языкы. И: вся земля да поклонитътися и поетъ Тебѣ, да поетъ же имени твоему, Вышній. И: хвалите Господа вси языци, и похвалите Его вси людіе. И еще: отъ въстокъ и до западъ хвально имя Господне: высокъ надъ всѣми языки Господь, надъ небесы слава Его. И: по имени твоему, Боже, тако и хвала твоя на концыхъ земля. Услыши ны, Боже, Спасителю нашь, упованіе всѣмъ концемъ земля, и сущимъ въ мори далече. И: да познаемъ на земли путь твой, и въ всѣхъ языцѣхъ спасеніе. И: цареве земьстіи и вси людіе, князи и вся судія земленыя, юноша и дѣвы, старцы съ юнотами, да въсхвалятъ имя Господне. И Исаіно: послушайте Мене, людіе мои, Глаголетъ Господь, и царіе къ Мнѣ внушите, яко законъ отъ Мене изыдетъ, и судъ Мой съвѣтъ странамъ: приближается скоро правда моа, и изыдетъ, яко свѣтъ, спасеніе мое. Мене острови ждутъ, и на мышцу мою страны уповаютъ.

Хвалитъ же похвальными гласы Римъскаа страна Петра и Павла, имиже вѣроваша въ Іисуса Христа Сына Божіа; и Ефесъ, и Патмъ—Іоанна Богослова; Индія—Фому, Египетъ—Марка; вся страны, и грады, и людіе чтутъ и славятъ коегождо ихъ учителя, иже научиша православной Вѣрѣ. Похвалимъ же и мы, по силѣ нашей, малыми похвалами—великаа и дивнаа сътворшаго нашего учителя и наставника, великаго Кагана нашеа земля, Владимера, внука стараго Игоря, сына же славнаго Святослава, иже, въ своа лѣта владычьствующа, мужствомъ же и храбъръствомъ прослушя въ странахъ многахъ, и побѣдами и крѣпостію поминаются нынѣ и словутъ. Не въ худѣ бо и не въ невѣдоми земли владычьствовашя, но въ Русской, яже вѣдома и слышима есть всѣми конци земля. Сій славный отъ славныихъ рождься, благородный отъ благородныхъ, каганъ нашь Владимеръ, и възрастъ и укрѣпѣвъ отъ дѣтьскыа младости, паче възмужавъ крѣпостію, и силою съврышаяся, мужствомъ же и смысломъ предспѣа, единодъръжецъ бывъ земли своей, покоривъ подъ ся округныя страны, овы миромъ, а непокоривыя мечемъ. И тако ему живущу въ дни своя, и землю свою пасущю правдою, мужествомъ, же и смысломъ, пріиде нань посѣщеніе Вышняго, призрѣ нань всемилостивное око благаго Бога, и въсіа разумъ въ сердци его, яко разумѣти суету идольскыа льсти, и възыскати единаго Бога, сътворшаго всю тварь видимую и невидимую. Паче же слышано бѣ ему всегда о благовѣрнѣй земли Гречьстѣй, Христолюбивѣй же и сильнѣй вѣрою како единаго Бога въ Троици чтутъ и кланяются; како въ нихъ дѣются силы и чюдеса и знаменія; како церкви людій исплънены; како веси и гради благовѣрни, вси въ молитвахъ прилежатъ; вси Богови предстоять. И си слышявъ, възжела сердцемъ и възгорѣся духомъ, якоже быти ему Христіяну и земли его. Еже и бысть, Богу тако изволившу, възлюбившу человѣчьское естьство. Съвлечежеся убо Каганъ нашъ и, съ ризами ветхаго человѣка, сложи тлѣнныя, оттрясе прахъ невѣръствіа, и, вшедъ въ святую купѣль, породися отъ Духа и воды. Въ Христа крестився, въ Христа облечеся, и изыде отъ купѣли бѣлообразуяся, сынъ бывъ нетлѣніа, сынъ воскрешеніа, имя пріимъ вѣчно, и именито въ роды и роды: Василій, имже написася въ книги животныя, въ вышнимъ градѣ и нетлѣннѣимъ Іерусалимѣ.—Сему же бывшу, не доселе стави подвига благовѣріа, ни о томъ токмо яви сущую въ немъ къ Богу любовь, но подвижеся паче и заповѣда по всей земли своей креститися въ имя Отца и Сына и Святаго Духа, и ясно и велегласно въ всѣхъ градѣхъ славитися Святѣй Троици, и всѣмъ Христіаномъ быти, малымъ и великымъ, рабомъ и свободнымъ, юннымъ и старымъ, бояромъ и простыимъ, богатымъ и убогымъ. И не бысть ни единогожъ противящася—благочестному его повелѣнію. Да аще кто и не любовію, но страхомъ повелѣвшаго крещахуся: понеже бѣ благовѣріе его съ властію спряжено. И въ едино время вся земля нашя възслави Христа съ Отцемъ и съ Святымъ Духомъ. Тогда начатъ мракъ идольскій отъ насъ отходити, и заря благовѣріа явишяся. Тогда тьма бѣсовскаго служенніа погыбе, и солнце Евангельское землю нашу осія; капища раздрушишася, и церкви поставляются; идолы съкрушаются, и иконы святыхъ являхуся; бѣси пробѣгаху: крестъ грады освящаше; и пастуси словесныхъ овецъ Христовъ, сташя Епископи и попове и діакони, бескровную жрьтву възносяще; и весь клиросъ украсишя влѣпоту и одѣшя святыя церкви. Апостальскаа труба и Евангельскый громъ вся грады огласи; теміянъ, Богу въспущаемъ, въздухъ освяти; монастыреве на горахъ сташя; черноризцы явишася; мужи и жены, маліи и велицыи, и вси людіе, исполньше святыа церкви, въславишя, глаголюще: единъ святъ, единъ Господь Іисусъ Христосъ, въ славу Богу Отцу, аминь. Христосъ побѣди, Христосъ одолѣ, Христосъ въцарися, Христосъ прославися! Велій еси Господи, и чюдна дѣла твоа! Боже нашь, слава Тебѣ!

Тебе же како похвалимъ, Отче честный и славный, въ земленыхъ владыкахъ премужственный Василіе? Како добротѣ твоей почюдимся, крѣпости же и силѣ? Каково ти благодареніе въздадимъ, яко тобою познахомъ Господа, и льсти идольскыа избыхомъ, яко твоимъ повелѣніемъ по всѣй земли Христосъ славится? Ли что ти приречемъ, Христолюбче, друже правдѣ, смыслу мѣсто, милостыни гнѣздо? Како вѣрова? Како разгорѣся въ любовь Христову? Како вселися въ тя разумъ, выше разума земленыихъ мудрецъ, еже възлюбити невидимаго, и о небнсныхъ подвигнутися? Како взыска ты Христа? Како предася Ему? Повѣждь намъ, рабомъ твоимъ, повѣждь намъ, учителю нашь: откуду ти припахну воня Святаго Духа? Откуду испи памяти будущая жизни сладкую чяшу? Откуду вкуси и видѣ, яко благъ Господь? Не видѣлъ еси Христа, ни ходилъ еси по Немъ: како ученикъ Его обрѣтеся? Ини видѣвше Его не вѣровашя. Ты же не видѣвъ вѣрова. По истинѣ сбысться на тебѣ блаженьство Господа Іисуса, реченное къ Ѳомѣ: блажени не видѣвше и вѣровавше. Тѣмже съ дръзновеніемъ несумненно зовемти: о блаженниче! самому тя Спасу нарекшу. Блаженъ еси, яко вѣрова къ Нему, и не съблазнися о Немъ, по словеси Его неложному: блаженъ есть, иже не съблазнится о Мнѣ. Вѣдущеи бо законъ и пророкы распяшя и; ты же ни закона, ни пророкъ почитавъ, Распятому поклонися. Како ти сердце разъвръзеся? Како вниде въ тя страхъ Божій? Како прилѣпися любви Его? Не видѣ Апостола, пришедша въ землю твою и нищетою своею, и наготою, и гладомъ же и жаждею сердце твое клоняща на смиреніе. Не видѣ бѣсъ изгоняща, именемъ Христовомъ; болящіихъ здравующь, огня нахладъ прелагаема, мертвыхъ въстающе: сихъ всѣхъ не видѣвъ, како убо вѣрова? Дивно чюдо! Иніи царіе и властеле, видяще си вся бывающа отъ святыхъ мужь, не вѣровашя, но паче на страсти и муки предаша ихъ. Ты же, о блаженниче, безъ всѣхъ сихъ притече къ Христу, токмо отъ благаго смысла и остроуміа разумѣвъ, яко Богъ единъ Творецъ, невидимыимъ и видимыимъ, небесныимъ и земленыимъ, и яко посла въ миръ спасенія ради възлюбленнаго Своего Сына. И си помысливъ, вниде въ святую купѣль. И, еже инѣмъ юродство мнится, тебѣ сила Божія вмѣнися.

Ксему же кто исповесть многыа твоа нощныа милостыня, и дневныя щедроты, яже къ убогымъ творяше, къ сирымъ же и къ болящимъ, къ должныимъ и къ вдовамъ, и къ всѣмъ требующимъ милости? Слышавъ бо бѣ глаголъ Господень Даніиломъ Навходоносору царю: съвѣтъ мой да будетъ ти годѣ, царю Навуходоносоре, и грѣхы твоа милостынями оцѣсти, и неправды твоа щедротами нищихъ. Иже слышавъ ты, Отче свѣтильниче, не до слышаніа стави глаголанное, но дѣломъ скончя слышянное, просящимъ подаваа, нагыя одѣваа, жадныя и алчныя насыщаа, болящимъ всяко утешение посылаа, длъжныа искупаа, работныя свобождаа. Твоя бо щедроты и милостыня и нынѣ въ человѣцѣхъ поминаемы суть, паче же предъ Богомъ и Ангелы Его. Еяже ради добропрелюбныя предъ Богомъ милостыня, много дерзновеніе имѣеши къ Нему, яко присный Христовъ рабъ. Помогаетми слово написано: милость хвалится на судѣ. Милостыни мужу, аки печать съ нимъ. Всесильнаго и милосердаго Господа глаголъ: блажени милостивіи, яко тіи помиловани будутъ. Иноже Апостольское послушество приведемъ о тебѣ отъ святыхъ писаній, реченое отъ Іякова Апостола, яко обративый грѣшника отъ заблужденіа пути его спасетъ душу отъ смерти, и покрыеть множество грѣховъ. Да аще единого человѣка обратившуюму толико възмездіе отъ благаго Бога: то каково убо спасеніе обрѣте, о Василіе, колико бремя грѣховно разсыпа, не единого обративъ человѣка отъ заблуженіа идольскыя льсти, ни десятины градъ, но всю область свою? Показаетъ ны и увѣряетъ Самъ Спасъ Христосъ, какоя тя славы и чьсти сподобилъ есть на небесѣхъ, глаголя: иже исповѣсть Мя предъ человѣкы, исповѣмъ и и Азъ предъ Отцемъ моимъ, иже есть на небесѣхъ. Да аще исповѣданія пріемлетъ о себѣ отъ Христа къ Богу отцу исповѣдавый Его токмо предъ человѣкы: колико ты похваленъ имаши быти, не токмо исповѣдавъ, яко сынъ Божій есть Христосъ, но и вѣру уставль не въ единомъ Соборѣ, но по всей земли сей, и церкви Христовы поставль, и служителя Ему введъ. Подобниче великаго Констянтина, равноумне, равно-Христолюбче, равночьстителю служителемъ Его! Онъ съ святыми Отцы Никейскаго Събора законъ человѣкомъ полагаше; ты же съ новыми отцы нашыми, Епископы, снимаяся чясто съ многымъ смиреніемъ съвѣщавашеся, како въ человѣцѣхъ сихъ новопознавшихъ Господа законъ уставити. Онъ въ Еллинѣхъ и въ Римлянѣхъ царство Богу покори: ты же въ Руси, о блаженниче, подобно. Уже бо и въ онѣхъ, и въ насъ Христосъ Царемъ зовется. Онъ же съ матерію своею Еленою крестъ отъ Іерусалима принесша, и по всему миру своему разславша, вѣру утвердишя: ты же съ бабою твоею Ольгою принесше крестъ отъ новаго Іерусалима, отъ Констянтина града, и сего, на земли своей поставивъ, утвердиста Вѣру. Егоже убо подобникъ сый, съ тѣмже единоя славы и чьсти обѣщника тя сътвори Господь на небесѣхъ, благовѣріа твоего ради, егоже имѣ въ животѣ своемъ.

Добръ послухъ благовѣрію твоему, о блаженниче, святаа церкви Святыа Богородица Маріа, юже създа на правовѣрнѣй основѣ, идеже и мужьственое твое тѣло нынѣ лежитъ, ожыдаа трубы Архангеловы. Добръ же зѣло и вѣренъ послухъ сынъ твой Георгій, егожь створи Господь намѣстника по тебѣ твоему владычеству, не рушаща твоихъ уставъ, нъ утверждающа, ни умаляюща твоему благовѣрію положеніа, но паче прилагающа, не казяща, нъ учиняюща, иже недокончанаа твоа доконча, акы Соломонъ Давыдова, иже домъ Божій великый святый Его Премудрости създа на святость и освященіе граду твоему, юже съ всякою красотою украси, златомъ и сребромъ и кеменіемъ драгыимъ, и съсуды честными, яже церкви дивна и славна всѣмъ округныимъ странамъ, якоже ина не обрящется въ всемъ полунощи земнѣмъ, отъ встока дъ запада, и славный градъ твой Кыевъ величьствомъ, яко вѣнцѣмъ обложилъ, предалъ люди твоя и градъ Святѣй всеславнѣй, скорѣй на помощь Христіаномъ, святѣй Богородици, ейже и церковь на великыихъ вратѣхъ създа въ имя первааго Господскааго праздника святааго Благовѣщеніа, да еже цѣлованіе Архангелъ дастъ Дѣвици, будетъ и граду сему. Къ оной бо: радуйся, обрадованная, Господь съ тобою! Къ граду же: радуйся, благовѣрный градѣ, Господь съ тобою!

Встани, о честнаа главо, отъ гроба твоего, встани, отряси сонъ! Нѣси бо умерлъ, но спиши до общаго всѣмъ встаніа. Встани, нѣси умерлъ, нѣсть бо ти лѣпо умрети, вѣровавшу въ Христа, живота всему міру. Отряси сонъ, взведи очи, да видиши какоя тя чьсти Господь тамо сподобивъ, и на земли не безпамятна оставилъ сыномъ твоимъ. Встани, виждь чадо свое Георгіа, виждь утробу свою, виждь милааго своего, виждь, егоже Господь изведе отъ чреслъ твоихъ; виждь красящааго столъ земля твоей, и возрадуйся, възвеселися. Къ семуже виждь и благовѣрную сноху твою Ерину, виждь вънукы твоа и правнукы, како живуть, како храними суть Господемъ, како благовѣріе держать по преданію твоему, како въ святыа церкви чястять како славятъ Христа, како покланяются имени Его. Виждь же и градъ величьствомъ сіяющь, виждь церкви цвѣтущи, виждь Христіанство растуще, виждь градъ иконами Святыихъ освѣщаемь блистающеся, и тиміаномъ объухаемь, и хвалами и божественами пѣніи святыими оглашаешь. И си вся видѣвъ, възрадуйся, и взвеселися, и похвали благаго Бога, всѣмъ симъ Сторителя.

Видѣ же, аще и не тѣломъ, но духомъ. Показаетъ ти Господь вся си, о нихже радуйся и веселися, яко твое вѣрное въсіаніе не исушено бысть зноемъ неверіа, нъ дождемъ Божіа поспѣшеніа расположено бысть многоплоднѣ. Радуйся, въ владыкахъ Апостоле, не мертвыа тѣлесы въскресивъ, нъ душею ны мертвы, умершаа недугомъ идолослуженіа, въскресивъ! Тобою бо обожихомь и живота Христа познахомъ; съкорчени бѣхомъ отъ бѣсовскыа лсти, и тобою прострохомся и на путь животный наступихомъ; слѣпи бѣхомъ отъ бѣсовска льсти сердечныими очима, ослѣплени невидѣніемь, и тобою прозрѣхомь на свѣтъ тресолнечнаго Божьства; нѣми бѣхомъ, и тобою проглаголахомъ, и нынѣ уже мали и велицѣи славимь единосущную Троицу. Радуйся, учителю нашь и наставниче благовѣрію! Ты правдою бѣ облеченъ, крѣпостію препоясанъ, истиною обутъ, смысломъ вѣнчанъ и милостынею, яко гривною и утварью златою, красуяся. Ты бо, о честнаа главо, нагыимъ одѣніе, ты бѣ алчнымъ кърмителемъ, ты бѣ жаждющіимъ утробъ охлажденіе, ты бѣ въдовицамъ помощникъ, ты бѣ странныимъ покоище, ты бѣ безкровныимъ покровъ, ты бѣ обидимыимъ заступникъ, убогыимъ обогащеніе.

Имже благыимъ дѣломъ възмездіе пріемля на небесѣхъ—блага, яже уготова Богъ вамъ, любящимъ Его, и зрѣніа сладкааго лица Его насыщаяся, помолися о земли своей и о людехъ, въ нихже благовѣрно владычствова, да съхранитъ я въ мирѣ и благовѣріи, преданѣмъ тобою, и да славится въ немъ правовѣріе, и да кленется всяко еретичьство, и да съблюдеть я Господь Богъ отъ всякоа рати и плѣненіа, отъ глада и всякоа скорби и сътужденіа. Паче же помолися о сынѣ твоемъ, благовѣрнемъ каганѣ нашемъ Георгіи, въ мирѣ и въ сдравіи пучину житіа преплути и въ пристанища небеснаго завѣтріа пристати не вредно корабль душевный, вѣру съхраньшу и съ богатствомъ добрыми дѣлы; безъ блазна же Богомъ даныа ему люди управивъшу, стати съ тобою непостыдно предъ престоломъ вседержителя Бога и за трудъ паствы людій его пріяти отъ Него вѣнець славы нетлѣнныа съ всѣми праведныими, трудившіимися Его ради.

Симъ же убо, о Владыко Царю и Боже нашъ, высокъ и славне, человѣколюбче, вздаяй противу трудомъ славу же и честь, причастникы творя твоего царства, помяни, яко благъ, и насъ нищіихъ твоихъ, яко имя Тебѣ: человѣколюбецъ. Аще и добрыхъ дѣлъ не имѣемъ, нъ многыа ради милости твоея спаси ны. Мы бо людіе твои и овцѣ паствы твоей, и стадо, еже новоначать пасти, изторгъ отъ пагубы идолослуженіа. Пастырю добрый, положивый душю за овцѣ! Не остави насъ, аще и еще блудимъ, не отверзи насъ, аще и еще съгрѣшаемь Ти, акы новокупленіи раби, во всемъ не угодяще господу своему. Не възгнушайся, аще и мало стадо, нъ рци къ намъ: не бойся, малое стадо, яко благоизволи Отець вашъ небесный дати вамъ царьствіе. Богатый милостію и благый щедротами! Обѣщався пріимати кающася и ожидаа обращеніа грѣшныихъ, не помяни многихъ грѣхъ нашихъ, пріими ны обращающася къ Тобѣ, заглади рукописаніе съблазнъ нашихъ, укроти гнѣвъ, имъже разгнѣвахомъ Тя, человѣколюбче: Ты бо еси Господь и Владыка, и Творецъ, и въ Тобѣ есть власть или жити намъ, или умрети. Уложи гнѣвъ, Милостиве, егоже достойни есмь по дѣломъ нашимъ; мимоведи искушеніе, яко персть есмь и прахъ. Не вниди въ судъ съ рабы своими. Мы, людіе твои, Тебе ищемъ, Тобѣ припадаемъ, Тобѣ ся мили дѣемъ. Съгрѣшихомъ и злаа сътворихомъ; не соблюдохомъ, ни сътворихомъ якоже заповѣда намъ. Земніи суще къ земныимъ преклонихомся и лукаваа съдѣяхомъ предъ лицѣмъ славы твоея, на похоти плотяныа предахомься, поработахомься грѣхови и печалемъ житейскамъ, быхомь бѣгуки своего Владыкы, убозіи отъ добрыихъ дѣлъ, окааніи злаго ради житіа. Каемся, просимъ, молимъ. Каемся злыихъ своихъ дѣлъ, просимъ, да страхъ твой послеши въ сердца наша; молимъ, да на страшномъ судѣ помилуетъ ны. Спаси, ущедри, призри, посѣти, умилосердися, помилуй. Твои бо есмь, твое създаніе, твоею руку дѣло. Аще бо беззаконія назриши, Господи, Господи, кто постоитъ? Аще въздаси комуждо по дѣломъ, то кто спасется? Яко отъ Тебе оцѣщаніе есть: яко отъ Тебе милость и много избавлніе. И души наши въ руку твоею, и дыханіе наше въ воли твоей. Отънелѣже бо благопризираніе твое на насъ, благоденьствуемъ. Аще ли съ яростію призриши, ищезнемъ яко утренняа роса. Не постоитъ бо прахъ противу бури, и мы противу гнѣву твоему. Нъ яко тварь отъ Створшааго ны милости просимъ. Помилуй ны, Боже, по велицѣй милости твоей. Все бо благое Тебе на насъ: все же неправедное отъ насъ къ Тобѣ. Вси бо уклонихомся, вси вкупѣ неключими быхомъ. Нѣсть отъ насъ ни единого о небесныихъ тщащася и подвизающа, въ вси о земныихъ, вси о печалѣхъ житейскыихъ. Яко оскудѣ преподобный на земли, не Тебѣ оставляющу и презрящу насъ, но намъ Тебе не взыскающемь, нъ видимыихъ сихъ прележащемь. Тѣмъже боимся, еда сътвориши на насъ, яко на Іеросолимѣ, оставльшиимъ Тя, и не ходившиимъ въ пути твоа. Но не сътвори намъ, яко и онѣмъ по дѣломъ нашимъ, ни по грѣхомъ нашимъ въздай намъ. Но терпѣ на насъ, и еще долго терпѣ; устави гнѣвный твой пламень, простирающся на ны, рабы твоа, Самъ направляа ны на истину твою, научая ны творити волю твою, яко Ты еси Богъ нашъ, и мы людіе твои, твоя часть, твое достояніе. Не въздѣваемъ бо рукъ нашихъ къ богу туждему, ни послѣдовахомъ лжууму коему пророку, ни ученіа еретичьскаа держимъ: нъ Тебе призываемъ истинаго Бога, и къ Тебѣ, живущему на небесѣхъ, очи възводимъ, къ Тебѣ рукы наши въздѣваемъ, молимътися: отъдаждь на ны, яко благій, человѣколюбець, помилуй ны, призываа грѣшникы въ покааніе и на страшнѣмъ твоемъ судѣ деснаго стоянія не отлучи насъ, нъ благовсловеніа праведныихъ причасти насъ. И донелиже стоитъ міръ, не наводи на ны напасти искушеніа, ни предай насъ въ рукы чуждіихъ, да не прозовется градъ твой градъ плѣненъ, и стадо твое пришельци въ земли не своей; да не прерѣкутъ страны: гдѣ есть Богъ ихъ? Не попущай на ны скорби, и глада, и напрасныихъ смертій, огня, потопленіа, да не отпадутъ отъ вѣры нетвердіи вѣрою. Малы показни, а много помилуй; малы язви, а милостивно исцѣли; вмалѣ оскорби, а вскорѣ овесели; яко не тьрпить наше естьство дълго носити гнѣва твоего, яко стебліе огня. Нъ укротись, умилосердись, яко твое есть еже помиловати и спасти. Тѣмже продължи милость твою на людѣхъ твоихъ, ратныа прогоня, миръ утверди, страны укроти, гладъ угобзи, Владыкѣ наши огрози странамъ, боляры умудри, грады разсѣли, Црковь твою възрасти, достояніе свое съблюди, мужи и жены и младенцѣ спаси. Сущая въ работѣ, въ плѣненіи, въ заточеніи, въ путехъ, въ плаваніи, въ темницѣхъ, въ алкотѣ и жажди и наготѣ, вся помилуй, вся утѣши, вся обрадуй, радость творя имъ и тѣлесную и душевную, молитвами, моленіемъ Пречистыа Ти Матере, и святыихъ небесныихъ Силъ, и предтече твоего и крестителя Іоанна, Апостолъ, Пророкъ, мученникъ, преподобныихъ и всѣхъ святыихъ молитвами. Умилосердися на ны и помилуй ны, да милостию твоею пасоми въ единеніи вѣры, вкупѣ весело и радостно славимъ Тя, Господа нашего Іисусъ Христа, съ Отцемъ, съ Пресвятыимъ Духомъ, Троицу нераздѣльну, единобожественну, царьствующу на небесѣхъ и на земли, Ангеломъ и человѣкомъ, видимѣй и невидимѣй твари, нынѣ и присно и во вѣкы вѣкомъ, аминь.

Вѣрую въ единаго Бога, славимаго въ Троици, Отца нерождена, безначала, безконечна, Сына же рождена, въ безначальна же и безконечна, Духа Свята, изходяща изъ Отца, и въ Сынѣ являющася събезначальна же, такожде и равна Отцу и Сыну; Троицу единосущну, лици жь раздѣляющуся, Троицу имены, единого же Бога. Не съливаю раздѣленіа, ни съединенія раздѣяю. Съвокупляются несмѣсно и раздѣляются нераздѣльнѣ. Отецъ бо нарицается, понеже рождая; Сынъ же, рожденіа ради; Духъ же Святый, исхода ради, нъ неотходенъ. Не бываетъ же Отецъ—Сынъ, ни Сынъ—Отецъ, ни Духъ Святый—Сынъ: нъ комуждо свое не смѣсно суще, развѣ Божества. Едино бо есть Божество въ Троици, едино господьство, едино царство. Обще трисвятое отъ Херувимъ, обещъ поклонъ отъ Ангелъ и человѣкъ, едина слава и благодареніе отъ всего міра.

Того единаго Бога вѣдѣ и Тому вѣрую, в Негоже имя и крестихся, въ имя Отца и Сына и Святаго Духа; якоже пріахъ отъ писаніа Св. Отецъ, тако научихся.

И вѣрую и исповѣдую, яко Сынъ, благоволеніемъ Отчемъ и Св. Духа хотѣніемъ, сниде на землю спасти родъ человѣческъ, небесъ и Отца не отлучився, и Святаго Духа осѣненіемъ вселися въ утробу Дѣвицѣ Маріи и зачаться, якоже Самъ единъ вѣсть, и родися безъ сѣмене мужеска, Матерь дѣвицею съхрань, якоже и лѣпо Богу, и въ рожество, и прежде рожьства, и по рожьствѣ,—Сыновства не отложь. На небеси бо безматеренъ, на земли же безъ отца, въздоися, яко человѣкъ, и вспитася, и бысть человѣкъ истиненъ, не привидѣніемъ, нъ истиною въ нашей плоти, исплонь Богъ, исполнь человѣкъ, въ двѣ естествѣ, хотѣніи воли; еже бѣ, не отложивъ, и еже не бѣ, взя. Пострада плотію, яко человѣкъ, мене ради, и Божествомъ безстрасти, яко Богъ, пребы. Умре безсмертный, да мене мертва оживить; сниде къ аду, да прадѣда моего Адама въставить и обожить, и діавола свяжеть. Въста, яко Богъ, изъиде изъ мертвыихъ, яко побѣдитель, Христосъ Царь мой, тридневно, и, явлься многъ кратъ ученикомъ своимъ, възиде на небеса къ Отцю, Егоже не отлучился бѣ, и сѣде одесную Его. Чаю Его пакы грядуща съ небесе, нъ не отай, якоже прежде, нъ въ славѣ Отчи съ небесныими вои, Емуже мертвіи гласомъ Архангельскъмъ противуизидуть, и тѣмъ имать судити живыимъ и мертвыимъ, и въздати комуждо по дѣломъ.

Вѣрую же и въ з҃ Сборъ правовѣрныихъ Святыихъ Отець, и егоже извергоша, и азъ изметаю; и егоже прокляша, и азъ проклинаю. И яже писаніемъ предаша намъ, пріимлю. Святую преславную Дѣвицу Марію Богородицу нарицаю, чьту же и съ вѣрою покланяюсь ей. И на святѣй иконѣ ей Господа моего, яко младенца на лонѣ ей, зрю и веселюся; распята и вижду и радуюся; въскресша Его и на небеса идуща смотря, въздѣю руцѣ и покланяюся Ему. Такоже и угодникъ Его Сватыихъ видѣвъ, славлю Спасшааго ихъ. Мощи ихъ съ любовію и вѣрою цѣлую, и чудеса ихъ проповѣдаю, и исцѣленіа отъ нихъ пріимлю. Къ Кафоликіи и Апостольстѣй Церкви притекаю, съ вѣрою вхожду, съ вѣрою молюся, съ вѣрою исхожду.

Тако вѣрую и не постыжуся, и предъ народы исповѣдаю, и исповѣданіа ради и душю свою положю.

Слава же Богу о всемъ, строящему о мнѣ выше силы моеа! И молите о мнѣ, честнѣи учители и Владыкы Рускы земля! Аминь.

Азъ, милостію человѣколюбивааго Бога, мнихъ и прозвитеръ Иларіонъ, изволеніемъ Его, отъ богочестивыихъ Епископъ священъ быхъ и настолованъ въ велицѣмъ и богохранимѣмъ градѣ Кыевѣ, яко быти ми въ немъ Митрополиту, пастуху же и учителю. Быша же си въ лѣто ҂ѕф҃нѳ, владычествуюущу благовѣрному Кагану Ярослву, сыну Владимирю. Аминь.